Çoxəsrlik tariximizə nəzər
salsaq görərik ki, Azərbaycan qadını tarix boyu öz fədakarlığı, analıq keydiyyəti
ilə milli dəyərlərimizin inkişafına böyük töhvələr verib. Qadınlarımız tarix
boyu gözəl ana olmaqla yanaşı, savaş meydanında, klassik ədəbiyyat yaratdığı
nümunələrlə, dövlət idarəçiliyində məharəti ilə də öz gücünü, qüdrətini, zəkasını
nümayiş etdirib.                Bildiyimiz kimi, Şərqin
ilk demokratik respublikası olan Azərbaycan Xalq Cümhuriyyəti dövründə
qadınlarımız seçib-seçilmək hüququ qazanaraq ölkəmizin ictimai-siyasi həyatında
yaxından iştirak etməyə başlamışlar. Dünyanın bir çox ölkələrinin qadınlarından
əvvəl seçib-seçilmək hüququ əldə etməsi, elm, mədəniyyət və digər sahələrdə
qazandığı uğurlar Azərbaycan qadınının mədəni və intellektual potensialından xəbər
verir. Azad cəmiyyətimizdə qadınlarımız sürətlə maariflənərək ictimai-siyasi həyatda
fəal ediblər. Ana dilimizin, mədəniyyətimizin və mənəviyyatımızın ən etibarlı dayağı
kimi bu mənəvi dəyərlərin gələcək nəsillərə ötürülməsində böyük xidmətlər göstərmişlər.
Bu gün də Azərbaycan xanımları dövlətçiliyimizin inkişafı naminə tariximizin
yaddaşına yazılan müdrik analarımızın qoyduğu adət-ənənəni, nümunəvi xüsusiyyətlərini
daşıyırlar.

Keçmişimizin unudulmaz
səhifələrindəki möhkəm iradəyə malik görkəmli qadın şəxsiyyətlərimizin yüksək ləyaqətinin,
ağbirçək analarımızın müdrikliyinin daşıyıcıları kimi müasir Azərbaycan
xanımları öz dərin zəkaları və tükənməz daxili potensialları ilə bu gün də
xalqa və cəmiyyətə fədakarcasına xidmət edirlər. 

Analarımız
torpaqlarımızın ərazi bütövlüyü və müdafiəsi uğrunda igid övladlar böyüdərək
onları vətənpərvər ruhda tərbiyə edirlər. Vətənin də bir ana olduğunu
övladlarına aşılayan analarımız bu müqəddəs amal uğrunda çalışmağın hər kəsin
borcu olduğunu uşaq yaşlarından övladlarının fikrinə, düşüncəsinə salırlar. Məhz
bu təbliğin, bu ruhun yüksək səviyyədə aşılanmasının nəticəsidir ki, Vətən
müharibəsində Azərbaycan gəncləri torpaqlarımızın düşmən tapdağı altından azad
edilməsi uğrunda igidliklə döyüşlərə atıldılar. Övladları şəhid olan
analarımız, həyat yoldaşı, qardaşı şəhid olan bacılarımız qürur və fəxr hissi
ilə başlarını dik tutaraq təki Vətən yaşasın dedilər.

Azərbaycan qadını arxa
cəbhədə də öz hünərləri, fədakarlıqları ilə döyüşçülərimizə arxa-dayaq oldular.
Xocalı dərdli Nəzakət Salmanova Vətən Müharibəsində yüzlərlə əsgərimizə ana əvəzi
oldu. Xocalı soyqırımında anası, bacısı, bacısının altı yaşlı oğlu, qardaşı şəhid
olmuş Nəzakət ana sözün əsl mənasında özünü oda verərək isti çörəklərini, yeməklərini
əsgərlərimizə pay etdi. Əlləri çörək qoxulu nuranə ana arxa cəbhəmizin böyük
dayaqlarından oldu. 

Bir Xocalı qadını kimi
qeyd etmək istəyirəm ki, həm Xocalının müdafiəsində, həm də Xocalı soyqırımı
zamanı qadınlarımız torpaqlarımıza bağlı layiqli vətəndaş, fədakar ana, Azərbaycan
kişisinin qeyrət və namusunu öz canından artıq tutan bir bacı kimi düşmənə göz
dağı olublar. Bunlara misal olaraq soyuq, qarlı meşədə düşmənin Xocalı sakinlərinin
yerini bilməməsi üçün öz körpəsini boğaraq səsini dayandıran qadınımızı, əsirlikdə
qızlarımızın üzünü tanınmaz hala salan analarımızı, yeri gələndə əllərinə silah
alaraq döyüşən qadınlarımızı göstərmək olar.

 Çağdaş Azərbaycan
qadını ana olmaqla yanaşı, həm də bacarıqlı siyasətçi, iş adamı, dövlət məmuru,
xalqın inanıb səs verdiyi deputatdır. Bu fəallıq Azərbaycan qadınının malik
olduğu tarixi ənənələrlə yanaşı, ölkəmizdə həyata keçirilən gender siyasətinin
mahiyyətindən, qadınlara cəmiyyətin tamhüquqlu üzvü kimi bütün imkanlardan bərabər
istifadə üçün zəruri şəraitin yaradılmasından irəli gəlir. Ulu öndər Heydər
Əliyevin qətiyyətli addımları nəticəsində 1993-cü ildən qadınların
ictimai-siyasi həyata transformasiyası, onların dövlət idarəçiliyində təmsilçiliyi,
bütün sahələrdə kişilərlə bərabər hüquqlara malik olması dövlət idarəçiliyi
kursunun prioritet istiqamətlərindən birinə çevrilib. Heydər Əliyevin Azərbaycan
qadını ilə bağlı fikirləri olduqca qiymətlidir: "Azərbaycan xalqı həmişə
qadına, onun cəmiyyətin həyatında oynadığı rola, tutduğu yüksək mövqeyə böyük
hörmətlə yanaşmışdır. Xalqın ən əziz, qiymətli və müqəddəs hesab etdiyi vətən,
torpaq, dil anlayışları ana adı ilə bərabər tutulmuşdur. Qadın adına göstərilən
dərin ehtiram, sonsuz ana məhəbbəti söz və sənət abidələrimizdə öz parlaq təcəssümünü
tapmışdır. Ədəbiyyatımızın və mədəniyyətimizin görkəmli nümayəndələri öz əsərlərində
Azərbaycan qadınının mərdliyini, gözəlliyini, mənəvi saflığını vəsf etmişlər".

Azərbaycan
Respublikasının Birinci vitse-prezidenti, Heydər Əliyev Fondunun prezidenti
Mehriban xanım Əliyeva hərtərəfli fəaliyyəti ilə həm ölkədə, həm də beynəlxalq
aləmdə Azərbaycan qadının nüfuzunu daha da yüksəklərə qaldırır. Mehriban xanım
Əliyeva müasir Azərbaycan qadınını təcəssüm etdirir. O, həm ictimai xadim, həm
ailə xanımı, həm ana kimi bütün qadınlarımıza cəmiyyətin həyatında layiqli yer
tutmaq nümunəsini göstərir. Azərbaycan qadını üçün səciyyəvi olan humanizm,
qayğıkeşlik və insanpərvərlik kimi ali mənəvi keyfiyyətlər Mehriban xanım
Əliyevanın şəxsiyyətində daha parlaq təcəssümünü tapır. Onun fəaliyyəti milli-mənəvi
dəyərlərə söykənən və intellektual yüksəlişə xidmət edən ideyaların cəmiyyətdə
daha da zənginləşməsinə və möhkəmlənməsinə yönəlmişdir.

Ölkənin Birinci
vitse-prezidentinin rəhbərliyi ilə milli maraqlarımıza xidmət edən və ənənələrimizi
yaşadan çoxlu sayda böyük layihələrin uğurla icra olunması Azərbaycan qadınının
mərhəmət və xeyirxahlığının, zəngin mənəvi-intellektual və yüksək əxlaqi dəyərlərə
malik olduğunun bariz nümunəsidir.

Azərbaycanda dövlət
qadın siyasətinin davam etdirilməsi sayəsində qadınınların cəmiyyətdə yeri və
nüfuzu daha da artıb. Ölkəmizdə gender siyasətinin gücləndirilməsi, qadınların
cəmiyyətdə rolunun yüksəldilməsi üçün ardıcıl tədbirlər həyata keçirilir. Azərbaycan
qadınları mühüm dövlət qurumlarında, parlament və bələdiyyələrdə uğurla təmsil
olunur, ictimai-siyasi, sosial-iqtisadi, elmi-mədəni proseslərdə fəal iştirak
edir, ölkə idmanının inkişafına böyük töhfələr verirlər.

Qadınlarımızın aktiv fəaliyyəti
həyatın bütün sahələrini əhatə edir. Qürurverici haldır ki, hazırda Azərbaycan
Ordusunun bütün qoşun növlərində, xüsusi təyinatlı təhsil müəssisələrində, hərbi
tibb ocaqlarında və digər sahələrdə yüzlərlə qadın xidmət edir, Vətən
qarşısında vəzifə borclarını şərəf və ləyaqətlə yerinə yetirirlər. Mülki işlərdə
çalışan qadınlarımızın da əməyi yüksək qiymətləndirilir.

8 Mart - Beynəlxalq
Qadınlar Günü ölkəmizdə rəsmi bayram günü kimi qeyd olunur. Hər il bayram günü ərəfəsində
dövlət başçısı 8 mart – Beynəlxalq Qadınlar günü münasibətilə Azərbaycan
qadınlarına təbrik ünvanlayır, Azərbaycan qadınlarının bir qrupuna fəxri adlar
verir, digər bir qrupu isə orden və ya medallarla təltif edir. Bu il də Azərbaycan
Respublikasının ictimai-mədəni həyatında səmərəli fəaliyyətlərinə görə və 8
Mart – Beynəlxalq Qadınlar Günü münasibətilə 07 mart 2022-ci il tarixli Sərəncamına
bir qrup xanımlar “Tərəqqi” medalı ilə təltif edilmişdir. Eyni zamanda ölkə
başçısı 8 Mart – Beynəlxalq Qadınlar Günü münasibətilə Azərbaycan qadınlarına təbrik
ünlanlayıb.  Lamiyə
Qarayeva, 

Xocalı
rayon İcra Hakimiyyəti başçısının müavini, 

İctimai-siyasi
və humanitar məsələlər şöbəsinin müdiri